5 Ffordd at Les

1. Cysylltu

Cawn fudd cadarnhaol a theimladau da wrth gysylltu â phobl o’n cwmpas. Efallai y bydd hi weithiau’n anoddach nag arfer i gadw mewn cysylltiad â phobl rydym yn poeni amdanynt ac efallai y bydd angen i ni ddod o hyd i ffyrdd newydd i aros mewn cysylltiad.

2. Bod yn Fywiog

Mae bod yn fywiog yn dda ar gyfer ein cyrff a’n meddyliau. Mae gweithgarwch rheolaidd yn helpu i leihau straen a gorbryder, yn rhoi hwb i’r hyder ac yn gwella lefelau egni. Mae llawer o weithgareddau am ddim i’w cael, dan do ac yn yr awyr agored, megis cerdded, beicio, garddio ac ioga. Mae’n bwysig dod o hyd i rywbeth rydych yn ei fwynhau ac sy’n addas ar gyfer eich gallu ac unrhyw gyflyrau iechyd a allai fod gennych.

Dim yn siŵr lle i ddechrau?

3. Bod yn Sylwgar

Gall rhoi mwy o sylw i’r presennol, eich meddyliau a’ch teimladau, eich corff a’r byd o’ch cwmpas, helpu i wella eich lles meddyliol. Mae enghreifftiau’n cynnwys eistedd yn dawel i wylio’r cymylau, rhoi sylw i’ch anadlu, neu arafu i lawr a sylwi go iawn ar y bwyd yr ydych yn ei fwyta. Yr enw a roddir ar y dull hwn yn aml yw Ymwybyddiaeth Fyfyriol.

4. Dal ati i Ddysgu

Gall dysgu rhywbeth newydd wella ein hyder. Rydym yn argymell gosod tasg i’ch hun y byddwch yn mwynhau ei chyflawni, megis:

• Ymgymryd â her newydd i wneud neu drwsio rhywbeth
• Ail-gydio mewn hen hobi sy’n eich herio, boed hynny’n ysgrifennu storïau, coginio, gwnïo, garddio neu chwarae gemau bwrdd
• Rhoi cynnig ar gwrs ar-lein, mae digon o rai i’w cael am ddim

5. Rhoi

Mae gwneud rhywbeth da dros ffrind, neu ddieithryn, yn fwy na dim ond bod yn dda iddynt hwy. Mae bod yn garedig i eraill yn helpu i leihau eich teimlad chi o straen a gorbryder. Nid yw gwên neu ddweud ‘helo’ wrth rywun yn costio dim ac mae’n gwneud i bobl deimlo’n gysylltiedig. Gall gweithredoedd bychan o garedigrwydd, megis helpu rhywun gyda’u siopa neu dreulio amser yn gwrando ar rywun, helpu’r rheini sy’n derbyn ac yn rhoi i deimlo’n dda.

Padlet Pum Ffordd

Rhaglen a ariennir gan Lywodraeth Cymru yw Cymunedau Digidol Cymru: Hyder Digidol, Iechyd a Lles (DCW: DCHW) sy’n helpu pobl i ddysgu sgiliau TG, i fynd ar-lein a defnyddio technoleg ddigidol. Yn ogystal â helpu pobl sy’n gwbl newydd i’r byd ar-lein, mae’r rhaglen yn cefnogi pobl i ddefnyddio technoleg er mwyn helpu i wella eu hiechyd a’u lles.

Datblygwyd y padlet i gyd-fynd â’r Pum Ffordd at Les. Mae yna ystod eang o adnoddau y gellir eu defnyddio i gadw pobl yn brysur mewn amrywiol ffyrdd.