Bwyta’n Iach

Bwyta’n Iach a Lles Meddyliol

Mae bwyta diet iach a chytbwys, gan gynnwys yfed digon o hylifau di-gaffein a di-alcohol yn bwysig ar gyfer meddwl iach.

Mae’r hyn rydyn ni’n ei fwyta a’i yfed yn effeithio ar ein hiechyd meddwl yn ogystal â’n hiechyd corfforol. Gall bwyta diet iach ac yfed digon o’r hylifau cywir helpu i wella’ch hwyliau a’ch ymdeimlad o les. Gall bwyta ac yfed yn dda roi mwy o egni i chi, yn ogystal â helpu i gyflawni a chynnal pwysau iach a lleihau’r risg o lawer o gyflyrau iechyd corfforol.

I gael rhagor o wybodaeth am sut mae diet yn effeithio ar ein hiechyd meddwl, gweler ein hadnoddau isod.

Beth yw diet iach?

Mae dilyn diet iach a chytbwys yn golygu bod ein cyrff yn cael yr holl ddaioni sydd ei angen arnynt i weithio’n dda ac yn lleihau’r risg o glefydau penodol, fel canserau, clefyd y galon a strôc.

Nid oes diet ‘un maint i bawb’. Mae Sefydliad Maeth Prydain yn cynghori y dylem gael ein harwain gan yr egwyddorion canlynol:

• Bwytewch ddigonedd ac amrywiaeth o ffrwythau a llysiau – o leiaf 5 Y DYDD
• Bwytewch ddigonedd o fwydydd llawn ffibr, yn enwedig grawn cyflawn
• Bwytewch amrywiaeth o ffynonellau protein – yn enwedig ffa, pys a chorbys
• Cynhwyswch fwydydd llaeth neu ddewisiadau amgen cyfnerthedig
• Dewiswch frasterau ac olewau annirlawn yn bennaf
• Lleihau’r bwydydd a’r diodydd sy’n uchel mewn braster, siwgr a halen

I gael rhagor o wybodaeth am sut y gallwch gael diet iach a chytbwys gweler ein hadnoddau isod.

Anhwylderau bwyta

Os ydych chi’n meddwl bod gennych chi, neu rywun rydych chi’n ei adnabod, anhwylder bwyta, darllenwch ein gwybodaeth am anhwylderau bwyta. Mae cymorth a chefnogaeth ar gael. Gallwch hefyd siarad yn gyfrinachol â chynghorydd o elusen anhwylderau bwyta. Gweler ein tudalen pwnc anhwylderau bwyta am adnoddau a llinellau cymorth perthnasol.